Campa cavaddu chi l'erba crisci... (Poesia in siciliano)

Campa cavaddu chi l'erba crisci
passata la notti lu jornu briisci;
spunta lu suli e s'ammuccia la luna 
bon capurannu e tanta fortuna.

Bon capurannu e bon Capo di misi
strazzàti linzola e faciti cammisi;
facitili beddi e di tanti culura
e supra d'ognuna mittitici un ciuri.

Un profumu di novu nte strati camina,
nta l'aria si senti e nun sulu a matina;
cantati e ballati finu a dumani
e a cù facisti aeri strincici i mani.

Fimmini, omini, picciotti e puru ranni
paci e saluti ad aviri e senza malanni;
chiddu chi n cori stasira è spiranza
dumani addiventa cirtizza e sustanza.

Bon capurannu amici e parenti,
a cù havi sordi e a cù un havi nenti;
pi tutti quanti ci su i megghiu auguri:
di passari cent'anni ma senza duluri.

Giacomo Palumbo di San Giuseppe Jato